Bu, bütün bölgə üçün dağıdıcıdır! - İranın inkar etdiyi plan ifşa olundu?

“Əgər İranla xüsusi əlaqəsi olan şiə rəhbərliyindəki İraq varsa və Suriya, “Hizbullah”, Livan da bu əlaqələrə daxil edilibsə, bu körfəz ölkələri bütün bölgə üçün dağıdıcı hilal deməkdir”.

Bu sözlər İordaniya Kralı 2-ci Abdullaha məxsusdur. Söhbət isə “Şiə ayparası” və ya “Şiə hilalı” – Yaxın Şərqdə əhalinin əksəriyyətinin şiə olduğu aypara şəkilli həssas bölgədən gedir.

Bu termin İran bütün şiə müsəlmanlarını bir bayraq altında birləşdirməyə çalışdığına görə bu ölkənin təsiri və ya nəzarəti altındakı əraziləri müəyyənləşdirmək üçün meydana gəlib.

Politoloq Vüqar Zifəroğlu bildirib ki, İranın Suriyada və Livanda hərbi varlığı İsrailə qarşı strateji üstünlük əldə etməyə yönəlib.

“Hazırda Livanda və Suriyada baş verənlər İranın bu strategiyasına qarşı ciddi təsir kimi qiymətləndirilə bilər. İran istər Livanda, istərsə də, Suriyada strateji mövqeyini qorumağa və möhkəmləndirməyə çalışır.

Onun hədəfləri həm hərbi, həm də ideoloji motivlərə əsaslanır. İran üçün mövcud Əsəd rejimi bölgədə strateji müttəfiqdir. Rejimin sabitliyi İranın Suriya vasitəsilə Livanda “Hizbullah”a dəstək verməsinə şərait yaradır”, – deyə o qeyd edib.