Çavuşoğlu ABŞ səfərindən danışdı
Entoni Blinkenlə görüşümüzdə qardaş Azərbaycanın barış üçün nə qədər səmimi olduğunu bildirdik.
Bunu “Report”a açıqlamasında ABŞ-də 4 günlük rəsmi səfərinin yekununda Türkiyənin xarici işlər naziri Mövlud Çavuşoğlu deyib. Nazir bildirib ki, ABŞ-dəki türk toplumu ilə bütün görüşlərində Azərbaycan və Türkiyə qardaşlığından bəhs edib.
“Bununla yanaşı, ABŞ dövlət katibi Entoni Blinkenlə görüşümüzdə qardaş Azərbaycanın Cənubi Qafqazda barış üçün nə qədər səmimi olduğunu, təkliflərinin diqqətə alınması gərəkdiyini, provakasiyaların dayandırılmasının vacib olduğunu söylədik. Bizim olmadığımız yerlərdə başda cənab Prezident İlham Əliyev olmaqla bütün azərbaycanlı qardaşlarımız Türkiyənin haqlarını müdafiə edirlər. Biz də Azərbaycanın olmadığı yerlərdə eyni şəkildə, Türkiyə Prezidenti və biz qardaş Azərbaycanın haqlarını hər yerdə müdafiə edirik. Çünki biz bir millətik”, - deyə Mövlud Çavuşoğlu bildirib.