Ceyhun Bayramov ABŞ rəsmisi ilə görüşüb

Xarici işlər naziri Ceyhun Bayramov ABŞ dövlət katibinin Avropa və Avrasiya məsələləri üzrə köməkçisinin müavini Erika Olsonu qəbul edib.

Bu barədə qurumdan məlumat verilib. Görüşdə tərəflər arasında ikitərəfli münasibətlər, bölgədə mövcud olan cari vəziyyət, Azərbaycan və Ermənistan arasında münasibətlərin normallaşması istiqamətində atılan addımlar müzakirə edilib.

Ceyhun Bayramov postmünaqişə mərhələsində Azərbaycanın Ermənistanla normallaşma həmçinin sülh sazişinin imzalanması istiqamətində əsas təşəbbüs irəli sürən tərəf kimi prosesin uğurla nəticələnməsində maraqlı olduğunu bildirib.

Buna baxmayaraq, qeyd edilən istiqamətlərdə Ermənistandan prosesə maneçilik səyləri, sülh sazişinin mətni üzrə Azərbaycanın sonuncu təkliflərinə 6 həftə ərzində hələ də cavab verməməsi, bir sıra provokativ bəyanatlar və təxribatlar diqqətə çatdırılıb.

Bununla yanaşı, Ermənistandan azaraq Azərbaycana keçmiş hərbçilərin qısa müddətdə Ermənistana geri təhvil verilməsi kimi etimad quruculuğu tədbirlərinə baxmayaraq, Ermənistanda Azərbaycan hərbçilərinə qarşı son zorakılığın Ermənistan tərəfindən pozucu fəaliyyətin nümunəsi olduğu qeyd edilib.

Bölgədə dayanıqlı sülh və təhlükəsizliyin təmin edilməsi üçün tərəflər arasında əldə edilmiş razılaşmaların həyata keçirilməsinin vacibliyi vurğulanıb.