Ceyhun Bayramov ATƏT rəsmisi ilə sülh prosesini müzakirə edib

Avqustun 10-da xarici işlər naziri Ceyhun Bayramovla Şimali Makedoniyanın xarici işlər naziri və ATƏT-in fəaliyyətdə olan sədri Buyar Osmani arasında telefon danışığı olub.

Ceyhun Bayramov Ermənistan tərəfindən Azərbaycanın ərazi bütövlüyü və suverenliyinə qarşı artan təxribatların sülh prosesinin irəliləməsinin qarşısının alınmasına hesablandığını diqqətə çatdırıb. Xüsusilə Ermənistanın bölgədə sabitliyin bərqərar edilməsi, erməni sakinlərin Azərbaycan cəmiyyətinə reinteqrasiya səylərinə təhdid törədən “Laçın” sərhəd-keçid məntəqəsinə qarşı törətdiyi təxribatlarının bu ölkənin sülh prosesində maraqlı olmadığını göstərdiyi bildirilib.

Həmçinin Ermənistanın “humanitar vəziyyət” və “blokada” kimi uydurma iddialar irəli sürməsinin heç bir əsasının olmadığı, erməni sakinlərin tələbatlarının ödənməsi üçün rəsmi Bakının təklif etdiyi “Ağdam-Xankəndi” yolunun fəaliyyətinə maneələr törədilməsinin siyasi xarakter daşıdığı diqqətə çatdırılıb.

Telefon danışığı zamanı qarşılıqlı maraq doğuran digər məsələlər ətrafında da fikir mübadiləsi aparılıb.