Ceyhun Bayramov iranlı həmkarı ilə görüşdü

Xarici işlər naziri Ceyhun Bayramov Xəzəryanı ölkələrin Xarici İşlər Nazirləri Şurasının iclasında iştirakı çərçivəsində iranlı həmkarı Hüseyn Əmir-Abdullahianla görüşüb.

Görüş zamanı 2 ölkə arasında ikitərəfli və regional məsələlər, habelə bölgədə mövcud vəziyyət müzakirə olunub. Son aylarda yüksək səviyyədə keçirilən görüşlərin və qurumlararası təmasların münasibətlərin inkişafı istiqamətinə verdiyi töhfə yüksək qiymətləndirilib.

Tərəflər bölgədə nəqliyyat və kommunikasiya dəhlizlərinin inkişafı və genişləndirilməsi istiqamətində planları müzakirə ediblər.

Ceyhun Bayramov Azərbaycan və Ermənistan arasında sülh prosesinin perspektivləri, Ermənistan tərəfindən törədilən maneçilik, habelə Qarabağ bölgəsində antiterror tədbirlərindən sonra həyata keçirilən işlər barədə qarşı tərəfə məlumat verib. Bölgədə Ermənistanın silahlandırılması səylərinin sülh və sabitliyə təhdid olduğu Ceyhun Bayramov tərəfindən vurğulanıb. Görüşdə həmçinin 2 ölkə arasında mövcud əməkdaşlıq gündəliyində duran digər ikitərəfli və regional məsələlər ətrafında fikir mübadiləsi aparılıb.