Ceyhun Bayramov Seyid Abbas Araqçı ilə nələri müzakirə etdi?

Xarici işlər naziri Ceyhun Bayramovla iranlı həmkarı Seyid Abbas Araqçı arasında telefon danışığı baş tutub.

Bu barədə Azərbaycan Xarici İşlər Nazirliyindən bildirilib.

Telefon danışığı zamanı Azərbaycan və İran arasında mövcud ikitərəfli əməkdaşlıq gündəliyi, habelə regional məsələlər müzakirə olunub.

Nazir Ceyhun Bayramov ilk növbədə həmkarını İranın xarici işlər naziri vəzifəsinə təyinatı münasibətilə təbrik edib, ona fəaliyyətində uğurlar arzulayıb, həmçinin nazir Seyid Abbas Araqçını ölkəmizə səfərə dəvət edib.

Tərəflər Azərbaycan və İran arasında bir sıra, o cümlədən iqtisadiyyat, ticarət, nəqliyyat və kommunikasiyalar sahələri üzrə birgə layihələrin icrası istiqamətində əməkdaşlığın daha da gücləndirilməsinə dair razılıq ifadə ediblər.

Telefon danışığı zamanı həmçinin qarşılıqlı maraq doğuran digər məsələlər ətrafında fikir mübadiləsi aparılıb, iki ölkə arasında əməkdaşlıq əlaqələrinin daha da inkişafı istiqamətində bir sıra səylərin davam etdirilməsinin vacibliyi vurğulanıb.