CHP sədri Bakıya gəlsə, Prezident onu qəbul edəcək?

“Cümhuriyyət Xalq Partiyası Türkiyədə yerli seçkiləri udmuş ana müxalifət partiyasıdır. Həm də Türkiyədə demokratik ənənələr formalaşıb. Ona görə bunu normal qəbul etmək lazımdır. Özgür Özəl də partiya sədri seçiləndən sonra iqtidara qarşı sərt ritorikadan imtina etdi, seçkilərin və siyasi mübarizənin xalqı parçalamalı olmadığını bəyan etdi. Ərdoğan da qarşılığında münasibətləri yumşaltmağın zəruriliyi barədə danışdı. Özgür Özəl Azərbaycan iqtidarına qarşı da CHP-nin əvvəlki möqeyindən imtina etdiyini ortaya qoydu. Bu baxımdan o, Bakıya gələrsə, böyük ehtimalla İlham Əliyev tərəfindən də qəbul olunacaq və bu baş verərsə, doğru qərar olar”.

Bu sözləri Ədalət, Hüquq, Demokratiya Partiyasının sədri, millət vəkili Qüdrət Həsənquliyev yerli mediaya geniş müsahibəsində deyib.

“Bizdə Rusiya parlamentindəki müxalifət partiyalarının sədrləri də ən yüksək səviyyədə qəbul olunub. Azərbaycanın düşünən insanı üçün başqa dövlətlərin partiya sədrlərinə fərqli münasibət nə qədər ağrılı olsa da, dövlətlərarası əlaqələr üçün çox əhəmiyyətlidir”, – o vurğulayıb.

Qeyd edək ki, Ö.Özəl partiya sədri seçiləndən sonra ilk səfərini Kuzey Kıprısa etdiyini, bunun ardınca Azərbaycana gəlmək istədiyini bildirib. Onun Azərbaycana münasibəti sələfindən ciddi şəkildə fərqlənir və CHP-nin yeni sədri Azərbaycan-Türkiyə qardaşlığına sadiqliyi ilə seçilir. Ö.Özəl Prezident Ərdoğan və MHP sədri Dövlət Baxçalı ilə də görüş keçirib.