Ciddi dəyişiklik olacaq | İlham Əliyev Suriya-Türkiyə əlaqələrindən söz açdı

“Biz çox şadıq ki, Suriyada dəyişikliklər baş verdi. Bu münasibətlə Türkiyə ilə Suriyanın yeni hökuməti arasında mövcud olan əlaqələr bizi də çox sevindirir”.

Bunu Prezident İlham Əliyev yanvarın 7-də yerli televiziya kanallarına müsahibəsində Yaxın Şərqdəki proseslərlə bağlı fikirlərini bölüşərkən deyib.

Dövlət başçısı Türkiyənin Suriyanın inkişafındakı rolundan bəhs edib.

“Əsəd rejiminin çökməsindən sonra Prezident Rəcəb Tayyib Ərdoğana zəng edərək bildirdim ki, Türkiyənin yanında olmağa hazırıq və bunu etməyə başlamışıq. Türkiyənin dəstəyi ilə birinci yardım karvanı da yola düşdü. Türkiyənin logistik dəstəyi olmasaydı, bu, mümkün olmazdı. Eyni zamanda bizim Xarici İşlər Nazirliyinin nümayəndə heyətinin Suriyaya göndərilməsi də Türkiyənin dəstəyi ilə olub”, – ölkə başçısı əlavə edib.

Prezident vurğulayıb ki, Türkiyənin bütün digər sərhədlərində də terrorçuluğa yer olmamalıdır: “Biz də Türkiyənin müttəfiqi kimi hər zaman istənilən formada onların yanındayıq və bunu Türkiyə tərəfi də bilir. Necə ki Türkiyə istənilən formada, hər bir məsələdə bizim yanımızdadır, biz də onun yanındayıq”.