Çin və Azərbaycan arasında əlaqələri strateji tərəfdaşlığa yüksəldən bəyanat

Çin və Azərbaycan liderlərinin 2025-ci il aprelin 23-də imzaladıqları Birgə Bəyanat 30 illik Azərbaycan-Çin münasibətlərini “hərtərəfli strateji tərəfdaşlıq” səviyyəsinə yüksəltmiş oldu.

Bu, iki ölkənin bütün sahələrdə bir-birinə dəstək olacağını rəsmən bəyan etməsidir. Atılan addım Cənubi Qafqazın geosiyasi çəkisini artırır, Azərbaycanın isə balanslaşdırılmış xarici siyasət xəttinə yeni güc qatır.

Bəyanatda vurğulanan əsas istiqamətlərdən biri suverenliyə qarşılıqlı hörmət, təhlükəsizliyin və ərazi bütövlüyünün qorunmasında bir-birinə qətiyyətli dəstək verilməsidir.

Tərəflər xalqlarının seçdiyi və milli şərtlərə uyğun olan inkişaf yolunu seçməkdə bir-birini dəstəkləyir, hər iki ölkənin təməl maraqlarının, suverenliyinin, təhlükəsizliyinin və ərazi bütövlüyünün qorunmasında bir-birinə qətiyyətli dəstək verirlər.

Azərbaycan tərəfi dünyada yalnız vahid bir Çinin mövcudluğunu, Tayvanın Çin ərazisinin ayrılmaz tərkib hissəsi olduğunu, Çin Xalq Respublikası hökumətinin bütün Çini təmsil edən yeganə qanuni hökumət olduğunu tanıyır, “Tayvanın müstəqilliyi”nin istənilən formasına qarşı qətiyyətlə çıxır və ölkənin yenidən birləşməsinin həyata keçirilməsində Çin hökumətini dəstəkləyir.

Bəyanatda həmçinin qeyd olunub ki, Çin Azərbaycan tərəfinin təklif etdiyi sülh gündəliyini qətiyyətlə dəstəkləyir və qarşıdurmaya yönəlmiş geosiyasi oyunları qeyri-məhsuldar hesab edir.

Tərəflər strateji oriyentir kimi dövlət başçılarının diplomatiyasını və ən yüksək səviyyədəki mühüm razılaşmaları rəhbər tutacaqlarını, ikitərəfli münasibətlərin davamlı və uzunmüddətli inkişafını təşviq edəcəklərini bəyan edir.

Hər iki ölkə beynəlxalq təşkilatlarda bir-birini dəstəkləmə və daxili işlərə qarışmamaq öhdəliyini götürür.