Çin XİN-in rəsmisi Bakı-Pekin əlaqələrindən danışdı

Azərbaycanla strateji tərəfdaşlığımız ölkələrimiz arasındakı 30 illik münasibətlərin inkişafı tarixinin mühüm mərhələsidir.

Bu barədə Çin Xarici İşlər Nazirliyinin rəsmi nümayəndəsi Mao Nin ənənəvi mətbuat konfransında bildirib.

Çinlə Azərbaycan arasında diplomatik münasibətlərin təməlinin 1992-ci ildə qoyulduğunu deyən Mao Nin 30 il ərzində bu əlaqələrin sağlam və sabit məcrada inkişaf etdiyini bildirib.

Qeyd edilib ki, son dövrlər Çin lideri Si Cinpin Azərbaycan Prezidenti İlham Əliyevlə bir neçə dəfə əlaqə saxlayıb və bu amil münasibətlərimizin strateji səviyyəyə yüksəlməsini təmin edib.

“Tərəflər dəfələrlə suverenlik və ərazi bütövlüyü kimi məsələlərdə bir-birinin mövqeyini dəstəkləyib. Çinlə Azərbaycan arasında qarşılıqlı ticarət dövriyyəsinin həcmi 1 milyard ABŞ dollarından çox olub. Eyni zamanda ölkələrimiz Şanxay Əməkdaşlıq Təşkilatı, Asiyada Qarşılıqlı Fəaliyyət və Etimad Tədbirləri üzrə Müşavirə, habelə Birləşmiş Millətlər Təşkilatı çərçivəsində də sıx əməkdaşlıq edirlər”, – deyə Çin Xarici işlər Nazirliyinin rəsmi nümayəndəsi Mao Nin bildirib.

Hər iki ölkə liderinin qarşılıqlı münasibətlərin strateji səviyyəyə çatdığını elan etdiyini xatırladan Mao Nin bildirib ki, bu amil Çin-Azərbaycan əlaqələrinin inkişafı tarixində yeni mərhələdir.