Deyirdilər ki, Göyçə gölü tərəfdən ermənilər gəlib sizi qıracaq | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində "Həyat Hekayəsi" verilişinin növbəti buraxılışı hazırlanıb.

"Ermənilər 1988-ci ildə bizə çox qəzəbli baxır, təzyiqlər göstərirdilər" adlı veriliş Qaraqoyunlu dərəsinin, Çəmbərək rayonunun Əmirxeyir kənd sakini Məmməd Qələndərlinin həyat hekayəsinə həsr olunub.

O, doğulduğu kənd haqqında təəssüratlarını bölüşüb, yaylağa çıxdıqlarını, Göyçə gölündə çimib balıq tutduqlarını, uşaqlıq illəri, eləcə də institut illərində imtahandan sonra dincəlmək üçün kəndə qayıtması ilə bağlı xatirələrini danışıb.

Onun sözlərinə görə, 1988-ci ildə erməni faşizminə görə doğma yurddan deportasiya olunublar:

"1988-ci ildə ermənilər bizə çox qəzəbli baxırdılar, bizə təzyiqlər başlamışdı. Gecələr kəndin sakinləri hamısı bir evə toplaşar, ov tüfəngləri ilə növbə çəkərdik. Dekabrın 7-də Şəmkir rayonunun Barun-Barsum kəndindən ermənilər artıq Əmirxeyir kəndinə doluşurdular və bizi zorla qovurdular. Bizi yük maşınlarına doldurub zorla deportasiya elədilər.

Rus əsgərləri deyirdilər ki, artıq getməlisiniz, sizin burada qalmağınız mümkün deyil. Camaat Çəmbərək rayonu ərazisindən Gədəbəy rayonuna gəldilər və oradan da Azərbaycanın müxtəlif bölgələrinə səpələndilər.

Biz yalnız vacib olan sənədləri, əşyaları götürə bildik. Anam quyudan kartofumuzu çıxaranda erməni haxçığı əlindən aldı. Ermənilər azərbaycanlıların qaz və hind toyuğunu 50 qəpiyə alırdılar. İmkan vermədi ki, özümüzlə iki-üç günlük ərzaq götürək".