Donald Trampdan Prezident İlham Əliyevə maraqlı hədiyyə

ABŞ lideri Donald Tramp Azərbaycan Prezidenti İlham Əliyevə maraqlı hədiyyə göndərib.

Hədiyyə Vaşinqtonda ABŞ, Azərbaycan və Ermənistan liderlərinin görüşündə çəkilmiş fotolardan ibarətdir.

D.Tramp həmin fotoların üzərinə ürək sözlərini də yazıb. Fotoların birində D.Trampın imzası ilə “İlham, siz böyük lidersiniz”, digərində isə “İlham, siz böyüksünüz” sözləri əksini tapıb.

Azərbaycan Prezidenti İlham Əliyev isə öz növbəsində rəsmi “X” hesabı vasitəsilə ABŞ liderinə təşəkkür edib:

“Prezident Donald Trampa şəxsi imzası ilə mənə hədiyyə etdiyi tarixi fotoşəkillərə və üzərində yazdığı xoş sözlərə görə təşəkkür edirəm. Prezident Donald Trampın Azərbaycan ilə Ermənistan arasında münasibətlərin normallaşdırılmasına, habelə Cənubi Qafqazda və dünyada sülh gündəliyinə verdiyi qətiyyətli dəstəyini yüksək qiymətləndirir və buna görə ona bir daha dərin minnətdarlığımı bildirirəm”.

Qeyd edək ki, avqustun 8-də Prezident İlham Əliyev ABŞ Prezidenti Donald Trampın dəvəti ilə Vaşinqtonda səfərdə olub. Səfər zamanı Ağ Evdə iki ölkə başçısı arasında görüş baş tutub.

Ardınca ABŞ Prezidenti Donald Tramp, Azərbaycan Respublikasının Prezidenti İlham Əliyev və Ermənistan Respublikasının Baş naziri Nikol Paşinyan arasında görüş keçirilib. Liderlərin iştirakı ilə Azərbaycan və Ermənistan arasında sülh müqaviləsi paraflanıb.