Ərdoğandan Bakı və Moskvaya mühüm çağırış | "Ümid edirik ki, neqativ hallar sona çatacaq"

“Türkiyə həm Azərbaycan, həm də Rusiya ilə dərin diplomatik və strateji əlaqələri olan ölkədir. Biz gərginliyi diqqətlə izləyirik və hər iki ölkəni təmkinli olmağa çağırırıq”.

Bu barədə Türkiyə Prezidenti Rəcəb Tayyib Ərdoğan Azərbaycana səfərindən sonra jurnalistlərə müsahibəsində deyib.

O qeyd edib ki, Türkiyə diplomatik gərginliyi azaldacaq bəyanatlarla məsələnin daha asan və əsaslı şəkildə həll olunacağına inanır:

“Ümid edirəm ki, iki ölkə arasındakı neqativ hallar ən qısa zamanda sona çatacaq. Ən böyük arzumuz odur ki, xoşagəlməz hadisələr Rusiya ilə Azərbaycan arasında münasibətlərə bərpaolunmaz zərər vurmasın. Lokal hadisələri və onların nəticələrini öz kontekstindən çıxarmadan həll etmək mümkündür”.

Türkiyə Prezidenti əlavə edib ki, Azərbaycana səfəri zamanı Prezident İlham Əliyevlə bu məsələni müzakirə edib.

“Prezident İlham Əliyev bu barədə çox diqqətli və ehtiyatlı addım atır. O bu məsələni gərginləşdirməyin tərəfdarı deyil”, − deyə Rəcəb Tayyib Ərdoğan bildirib.