Erməni fəal soydaşlarına çağırış etdi

“Azərbaycan vətəndaşlığını almaq üçün müraciət edən ilk erməni mən olmuşam. Öz timsalımda göstərmək istəyirdim ki, ermənilər Qarabağda yaşaya bilər və onların heç bir problemi olmayacaq. Tezliklə yaraları sağaltmaq və normal həyata qayıtmaq vaxtı gələcək. Mən Qarabağa köçüb orada yaşamaq istəyirəm”.

Bu sözləri tanınmış erməni fəal və bloger İşxan Verdyan Baku TV-yə müsahibəsində bildirib. O əlavə edib ki, kabusun sonu gəldi. Daha ölüm olmayacaq. Qarabağda qalmaq istəyən ermənilərə gün doğdu.

“Azərbaycan Qarabağda yaşayan erməni sakinlərin reinteqrasiyası ilə bağlı rəsmi açıqlama verəndə və onların Azərbaycan vətəndaşlığını alıb Qarabağda yaşaya biləcəkləri bildirildikdə mən qərar verdim ki, köçüb orada yaşayacam. Bu münasibətlə Azərbaycan Prezidentinə müraciət edərək mənə vətəndaşlığın və Xankəndidə yaşayıb işləmək imkanının verilməsini xahiş etdim. Mən hələ də mövqeyimi dəyişməmişəm. Qarabağa səfər etməyə və ora köçməyə iki əlli razıyam. Mən bundan sonra Qarabağda qalacaq ermənilərlə yaşamaq istəyirəm.

Əminliklə deyə bilərəm ki, Qarabağ Qafqazın ən yaxşı bölgələrindən birinə çevriləcək və bir erməni olaraq orada yaşamaq mənim üçün rahat olacaq. Belə bir fürsət yaranan kimi məmnuniyyətlə ora köçəcəyəm”, – deyə bloger qeyd edib.

İşxan Verdyan vurğulayıb ki, erməni sakinlərin ağlı olsa, indi Qarabağdan qaçmaq əvəzinə, Azərbaycanla sülh içində yaşamağı üstün tutub, orada qalardılar.