“Erməni nazir dedi ki, yaxşı işi sizə yox, öz ermənilərimə verərəm” | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində "Həyat Hekayəsi" verilişinin növbəti buraxılışı hazırlanıb.

"Göy məsciddə namaz qılanda ermənilər bizə daş atırdılar" adlı veriliş 90 yaşlı İrəvan şəhər sakini Rəfiqə Məmmədovanın həyat hekayəsinə həsr olunub.

O, uşaqlıq, orta məktəb illərindən bəhs edib, İrəvan Pedaqoji İnstitutunu bitirdikdən sonra həyat yoldaşı ilə Dərələyəz rayonunun Qovuşuq kəndində 10 illik məktəbdə üç il işlədiyini, yenidən İrəvan şəhərinə qayıtdıqlarını, işlə təmin edilmədiklərini deyib:

"Biz nazirliyə getdik dedik ki, bizə iş verin, işləyək. Nazir bizə baxdı və dedi ki, siz azərbaycanlısınız, sizə iş vermərəm. Çünki o işi mən elə öz ermənilərimə verərəm. Yaxşısı budur ki, başınızın çarəsini qılın və öz yerinizə, yurdunuza çıxın gedin".

R.Məmmədova ata-anasının və özünün şahidi olduğu erməni məkrliyindən də danışıb:

"Atam həmişə ermənilərin azğınlığından, onların törətdiyi vəhşiliklərdən danışırdı. Anam deyirdi ki, 1918-ci ildə ermənilər bizim camaatımızı diri-diri torpağın altına basdırıb üstünü örtüblər. Erməni qadın türkcə danışdığımız üçün məni və əmim oğlunu tramvaydan düşürdü, dedi ki, türkcə danışanların səsini eşitmək istəmirəm. Ermənilər İrəvanda bütün adları dəyişib, öz adlarını qoyurdular. Göy məsciddə namaz qılanda ermənilər bizə daş atırdılar".