Ermənilər Əştərəyə niyə kütləvi axın ediblər? | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində erməni saxtakarlığından ən çox zərər çəkən türk-oğuz yurdlarından biri – Əştərək rayonu haqqında süjet hazırlanıb.

“Qıpçaq türk qalalarının yerləşdiyi oğuz yurdu” adlı süjetdə tarix boyu azərbaycanlılara qarşı etnik, dini və milli ayrı-seçkilik siyasəti yürüdən Ermənistanın xəbis əməllərindən əl çəkməyərək addəyişmə əməliyyatlarını açıq şəkildə həyata keçirməsindən, hayların bizə aid şəhərləri, qəsəbələri, kəndləri daim mənəvi terrora məruz qoymalarından bəhs olunur.

Bildirilib ki, Əştərək Qərbi Azərbaycanın, indiki Ermənistanın Karbibasar mahalı ərazisində yerləşən qədim türk-oğuz yurdudur. Bu məkan XVI-XIX əsrlərdə İrəvan xanlığına tabe olan Karbibasar mahalının tərkibində olub.

Nəhayət, 1828-ci ildə Çar Rusiyasının işğalından sonra İrəvan quberniyasının İrəvan qəzasının, sonra Eçmiədzin qəzasının tabeliyinə keçib. Əştərək rayonunun Yağaverd kəndi ərazisində VI-VII əsrlərə aid qədim arman-türk məbədi, Qarqavəng məbədi və VII əsrə aid Qırmızıvəng məbədi mövcud olub. Hər üç məbədin yerləşdiyi ərazilərə ermənilərin ilk gəlişi XVIII əsrə təsadüf edir.

Qeyd olunub ki, Ermənistan adlanan ərazidə sovet hökuməti qurulandan sonra 1929-cu ildə rayonlaşdırma inzibati-ərazi bölgüsü aparılıb:

“Bu bölgüyə əsasən, 1930-cu il sentyabrın 9-da ərazi inzibati vahidi kimi Əştərək adlı rayon yaradılıb. Vaxtilə Əştərək rayonuna daxil olan 50 kəndin 46-da azərbaycanlılar yaşayıb, yer adları da türk mənşəli olub. 1948-1951-ci illərdə rayonun Talış, Təkiyyə, Uçan, Çadqıran, İnəkli, Tülnəbi və digər kəndlərinin əhalisi zorla çıxarılaraq Azərbaycana köçürülüb.

Bununla da Əştərək ərazisində toponimlərin dəyişdirilməsi, türk-oğuz izlərinin itirilməsi prosesi başlayıb və rayon üzrə 20-yə yaxın tarixi yer adları dəyişdirilib”.