Ermənilərə yaranmaq üçün Azərbaycanı pisləyənlər kimlərdir?

“Rusiyada KİV-də və ictimai xadimlər arasında çox qəribə bir tendensiyanı son günlərdə müşahidə etməkdəyəm. Hazırda Ermənistanın ABŞ ilə imzaladığı xartiya, həmçinin Avropa İttifaqı missiyasının Ermənistanda olması, eyni zamanda bu ölkənin Rusiya əleyhinə verdiyi bəyanatlar olduğu halda şimal qonşumuzun mediası, ictimai xadimləri Azərbaycanı hədəf alıblar. Ölkəmizi bu və ya başqa şəkildə tənqid edirlər”.

Bunu Baku TV-nin departament rəhbəri, jurnalist Turan İbrahimov deyib.

O qeyd edib ki, xüsusilə də Konstantin Zatulin kimi şəxslərin səsləri daha yüksəkdən çıxmağa başlayıb:

“Burada Vladimir Solovyov və digər ənənəvi ruporların mövqeyindən də danışmaq olar. Həmçinin bəzi media resursları var ki, onlar dolayısı ilə Kremllə əlaqəlidirlər. Onlarda da eyni tendensiya artan sürətlə davam edir. Məhz Kremlin ruporu olan media resursları, televiziya verilişləri səbəbli-səbəbsiz Azərbaycanı tənqid edir. Buradan bizim anladığımız odur ki, ölkəmizin müstəqil, öz milli maraqlarını qoruyan duruşu onları şoka salıb”.

T.İbrahimli vurğulayıb ki, xüsusilə dövlət başçımızın verdiyi açıqlamalar, təyyarə qəzası ilə bağlı birbaşa Rusiyanın məsuliyyət daşıdığını dönə-dönə dilə gətirməsi onları sözün əsl mənasında məyus edib:

“İfadələrindən belə başa düşürük ki, fərqli reaksiya gözləyirlərmiş. Azərbaycanın keçmiş Sovet ölkələrinə nümunə olan müstəqil, suveren, milli maraqlardan çıxış edən mövqeyi onları narahat edir və bu narahatlığı isə Azərbaycanın əleyhinə müxtəlif qıcıqlandırıcı ifadələr işlətməklə, tarixin müəyyən məqamlarını öz baxış bucaqları ilə gündəmə gətirməklə kompensasiya etməyə çalışırlar”.