Ermənilərin sərhəddəki təxribatı ilə bağlı Peskovdan açıqlama

“Biz hər iki tərəfi təmkinli olmağa çağırırıq”.

Bu barədə Kremlin mətbuat katibi Dmitri Peskov fevralın 12-si və 13-də Ermənistan və Azərbaycan şərti sərhədində baş verən gərginliyi şərh edərkən deyib.

Bildirib ki, bu cür hadisələr danışıqlar prosesinin irəliləməsinə kömək etmir, hətta sülh müqaviləsinin imzalanmasına da yaxınlaşdırmır.

Şərti sərhəddə baş verən toqquşmanı “narahatlıq doğuran xəbər” adlandıran D.Peskov həmçinin rəsmi Moskvanın hadisələri diqqətlə izlədiyini bildirib. Kremlin mətbuat katibi barış sazişinin imzalanması üçün danışıqlar prosesinin davam edəcəyinə ümid etdiyini də söyləyib.

Xatırladaq ki, fevralın 13-də Dövlət Sərhəd Xidməti Ermənistan Silahlı Qüvvələrinin fevralın 12-də törətdikləri təxribata cavab olaraq “Qisas əməliyyatı” həyata keçirib. Nəticədə 4 erməni hərbçisi məhv edilib. Qafan rayonunun Nerkin-And yaşayış məntəqəsinin yaxınlığındakı döyüş postu tamamilə darmadağın edilib, döyüş mövqeləri susdurulub.