Ermənilərin təxribatı ilə törədilən Sumqayıt hadisələrinin ildönümü

Ermənilərin təxribatı ilə törədilən Sumqayıt hadisələrindən 36 il ötür.

1988-ci il fevralın 28-də baş vermiş bu hadisələr SSRİ Dövlət Təhlükəsizlik Komitəsinin erməni millətçiləri ilə birgə Azərbaycana qarşı təşkil etdiyi və həyata keçirdiyi təxribatların növbəti tərkib hissəsi idi.

Məqsəd isə hər zaman olduğu kimi, dünya ictimaiyyətində yanlış rəy formalaşdırmaq, anti-Azərbaycan əhvali-ruhiyyəsi yaratmaq idi.

Sumqayıt hadisələri sonradan Ermənistanın əlində bir bəhanəyə çevrildi. Bundan arqument kimi istifadə etməyə başlanıldı. Lakin hadisə ilə bağlı aparılan araşdırmalar, toplanılan şahid ifadələri və istintaq materialları əsl həqiqəti ortaya çıxardı.

İstintaqla müəyyən edilmişdi ki, hadisələrin təşkilatçısı 2 dəfə məhkim olunmuş erməniəsilli Eduard Qriqoryandır. Aparılan araşdırmalarla onun şəxsən 5 ermənini qətlə yetirməsi müəyyən olundu.

SSRİ Baş Prokurorluğunun apardığı istintaqla Sumqayıt hadisələri nəticəsində 26 erməni və 6 azərbaycanlının öldürüldüyü müəyyənləşdi. Məhkəmənin müvafiq qərarı ilə 92 nəfər uzunmüddətli həbs cəzasına, 1 nəfər isə ölüm hökmünə məhkum olundu.

Sumqayıt hadisələrinin təşkilatçısı erməniəsilli Eduard Qriqoryan olsa da, təəssüf ki, ölüm hökmü azərbaycanlı Əhməd Əhmədov barəsində çıxarıldı. Öldürülən ermənilərin əksəriyyəti isə erməni terror fondlarına pul köçürməkdən imtina edənlər idi.

Bir sözlə, Sumqayıtda etnik zəmində törədilən iğtişaş həmin dövrdə bu sıradan olan məqsədyönlü təxribatların kuliminasiyası idi.