Ermənistan işğalçı dövlət kimi məsuliyyət daşıyır | Baş Prokurordan mühüm açıqlama

“Azərbaycan uzun müddət qonşu Ermənistan Respublikası tərəfindən işğal və hərbi təcavüzə məruz qalıb. Bu işğal dövründə xalqımıza qarşı etnik təmizləmə siyasəti aparılıb, çoxsaylı hərbi cinayətlər və insanlıq əleyhinə cinayətlər törədilib. Nəhayət 2020-ci ildə Vətən müharibəsi və 2023-cü ildə antiterror əməliyyatı nəticəsində ölkəmizin ərazi bütövlüyü və suverenliyi tam bərpa edildi”.

Bu fikirlər Prezident İlham Əliyevin Beynəlxalq Prokurorlar Assosiasiyasının Bakı şəhərində keçirilən 29-cu İllik Konfransı və Ümumi Yığıncağının iştirakçılarına ünvanladığı müraciətdə yer alıb. Dövlət başçısının müraciətini Baş prokuror Kamran Əliyev səsləndirib.

“İşğal dövründə 4 minə yaxın azərbaycanlı itkin düşüb. Onlar Ermənistan tərəfindən işgəncələrə məruz qalaraq qətlə yetirilib və kütləvi məzarlıqlarda basdırılıb. Ermənistan hazırda itkin düşmüş bu şəxslərin sonrakı aqibəti, habelə onların basdırıldığı kütləvi məzarlıqların yeri barədə məlumatları bizə təqdim etməkdən imtina edir.

Həmçinin işğal dövründə Azərbaycan xalqına məxsus maddi-mədəniyyət abidələri, eləcə də dini ibadət yerləri, bütövlükdə 9 şəhər və yüzlərlə kənd və qəsəbə tamamilə məhv edilib. Bu cinayət əməllərinə görə Ermənistan işğalçı və təcavüzkar ölkə olaraq dövlət səviyyəsində məsuliyyət daşıyır. Bütün bu cinayətləri törətmiş Ermənistan tərəfi Azərbaycan xalqından üzr istəmək əvəzinə, ölkəmizə qarşı əsassız ittihamlar irəli sürür. Bütün bunlara baxmayaraq, bu gün Azərbaycan bölgədə davamlı sülh və sabitliyə nail olmaq üçün səylərini davam etdirir”, – deyə müraciətdə qeyd edilib.