Ermənistan Milli Təhlükəsizlik Xidmətinin rəhbəri Bakıya gəlir

Ermənistanın Milli Təhlükəsizlik Xidmətinin direktoru Andranik Simonyanın başçılıq etdiyi nümayəndə heyəti Azərbaycanda baş tutacaq forumda iştirak edəcək.

“Sputnik Armenia”da yayılan xəbərə görə, bu barədə Milli Təhlükəsizlik Xidmətinin mətbuat xidməti məlumat yayıb.

Andranik Simonyanın başçılıq etdiyi nümayəndə heyəti sentyabrın 19-21-i tarixlərində Bakıda keçirilən beynəlxalq təhlükəsizlik forumuna qatılacaq.

Xatırladaq ki, avqustun 8-də Azərbaycan Prezidenti İlham Əliyev, Amerika Birləşmiş Ştatlarının Prezidenti Donald Tramp və Ermənistanın Baş naziri Nikol Paşinyan Vaşinqtonda Birgə Bəyannamə imzalayıblar.

Bəyannamədə Azərbaycan və Ermənistan arasında sülhün və dövlətlərarası münasibətlərin təsis olunması, ATƏT-in Minsk qrupunun ləğvi ilə bağlı müraciət, ərazi bütövlüyü, Naxçıvanla Azərbaycanın digər əraziləri arasında quru əlaqəsini təmin edəcək “Beynəlxalq Sülh və Rifah naminə Tramp Marşrutu”nun razılaşdırılması kimi məsələlər əks olunub. Bununla yanaşı, Azərbaycanla Ermənistan arasında sülh sazişinin mətni paraflanıb.