Ermənistan Rusiyaya görə təhlükə altındadır? | Politoloqdan açıqlama

Konstitusiyasının dəyişilməsi ilə bağlı müzakirələrin davam etdiyi bir vaxtda Ermənistan indi də özünü bitərəf elan edib.

Daha dəqiq desək, ölkə ərazisindən xarici silahlı qüvvələrin çıxarılması üçün qanuna dəyişiklik edilməsi gündəmə gətirilib. Bu isə o deməkdir ki, Rusiyanın Ermənistanda yerləşən hərbi bazaları ləğv edilə, hərbçiləri də ölkədən çıxarıla bilər.

Nəzərə alsaq ki, Nikol Paşinyan hakimiyyətə gələndən sonra Qərbin diqtəsi ilə atdığı bütün addımları Ermənistanda Rusiyanın mövcudluğuna son qoymağa hesablanıb. Sözügedən dəyişikliyin də bununla bağlı olduğu istisna deyil. Halbuki Ermənistan Ordusunun silah təchizatını böyük ölçüdə rəsmi Moskva təmin edir, Rusiyanın Gümrüdə hərbi bazası, Erebunidə hərbi hava qüvvələri dislokasiya olunub.

Üstəlik, Ermənistanın sərhədləri də Rusiya hərbçiləri tərəfindən qorunur. Bu baxımdan erməni siyasi elitasının atacağı bu addımın ölkə üçün hansı nəticələrə gətirib çıxaracağı sirr deyil.

Təbii ki, Ermənistan müstəqil ölkə deyil və onun mövcudluğu da başqa ölkələrdən asılıdır. Bu isə o deməkdir ki, əslində, Nikol Paşinyanın məqsədi xarici hərbi qüvvələri ölkədən çıxarmaq yox, onları yeniləri ilə əvəzləməkdir. Çünki İrəvan hakimiyyəti özü də bilir ki, mövcud şərtlər altında müstəqil siyasət yürütmələri real deyil.