Ermənistana qarşı yeni İran əngəli | Moskva nəyə çalışır?

“Azərbaycan lideri siyasi arenada müsbət qarşılanan şəkildə bütün mövzular üzrə ölkəsinin aydın mövqeyini gizli qeydlər olmadan təqdim edib. Lakin bunu müharibənin ağır zərbəsindən sonra belə aydın xarici siyasət yeritməyən Ermənistan haqqında demək mümkün deyil”.

Bunu rusiyalı ermənipərəst politoloq Stanislav Tarasov deyib.

“Azərbaycan tərəfi həm regionda, həm də onun hüdudlarından kənarda özünü inamlı hiss edir. Azərbaycanın İranla münasibətləri gərgin olub, fikir ayrılıqları olub, bu da həll edilib, İranla marşrut qurulur.

İlham Əliyevin birbaşa danışıqlar nəticəsiz qalacağı təqdirdə ümidlərini regional platformalara və regional tərəfdaşlara bağlayaraq, Qərbi vasitəçi kimi inamla rədd etməsi buna görədir. Lakin burada da İrəvanın fərqli mövqeyi var, o, Qərbə arxalanır, baxmayaraq ki, Azərbaycan, Rusiya, İran və Türkiyə regional və qeyri-regional məsələlərdə həmfikirdirlər.

İranın Ermənistanla münasibətlərinin müsbət tarixi olub, lakin erməni tərəfi də İranın vasitəçiliyini istəməyib. Təbii ki, İran bunu, eləcə də İrəvanın Qərblə yaxınlaşmaq istəyini bəyənmir və Ermənistan üçün yeni problem yaranır.

Münasibətləri çox pis olan Rusiyadan danışmağa ehtiyac yoxdur, baxmayaraq ki, Moskva onları xilas etməyə çalışır. Türkiyəyə gəlincə isə onlarla heç bir münasibət yoxdur. Bu, təbii ki, müharibədən sonra Azərbaycana yaranmış onsuz da yüksək inamı artırır və Bakı eyni strategiya ilə irəliləməkdə davam edir”, – o bildirib.