Ermənistanda yeni konstitusiya nə vaxt qəbul olunacaq?

Ermənistanın Baş naziri Nikol Paşinyan hakim “Vətəndaş müqaviləsi” partiyasının qurultayında partiyanın qəbul etdiyi bəyannaməni təqdim edib. Bəyannamədə Azərbaycan-Ermənistan sülh prosesi ilə bağlı məqamlar da yer alıb.

2026-cı ildə keçiriləcək növbəti parlament seçkilərində xalqın etimad səsini aldıqdan sonra hökumət referendum yolu ilə Ermənistan Respublikasının yeni Konstitusiyasının qəbulu prosesinə start verəcək.

Bu, 1991-ci il Almatı Bəyannaməsinə əsaslanaraq Ermənistan Respublikasının beynəlxalq səviyyədə tanınmış 29,743 kvadratkilometr suveren ərazisinin və həmin ərazini əhatə edən sərhədlərin həm daxildə, həm də xaricdə toxunulmazlığı konsepsiyasına əsaslanacaq.

Regionallaşma, eləcə də balanslaşdırılmış və şaxələndirilmiş xarici siyasətlə ziddiyyət təşkil etmədən Ermənistan Respublikasının Avropa İttifaqına daxil olmasına yönələn səyləri gücləndirəcək. Bütün qonşularla sülh və mehriban qonşuluğu bərqərar etmək üçün xalq tərəfindən formalaşdırılan mesajları həyata keçirməyə davam edəcək.

Bəyannamədə bütün bunların Ermənistanın dövlət maraqlarına, ölkənin müstəqilliyi və suverenliyinin möhkəmləndirilməsinə, Azərbaycanla Ermənistan arasında bərqərar olmuş sülhə əsaslandığı bildirilib.

Həmçinin 3-cü Ermənistan Respublikasının tarixinin təhlil olunacağı da qeyd olunub. Nikol Paşinyan bunların Ermənistanın gələcək strateji fəaliyyəti olduğunu vurğulayıb.

“Biz 4-cü Ermənistan Respublikasının yaradılmasını qarşıda duran strateji vəzifə kimi elan edirik”, – deyə Baş nazir əlavə edib.