Ermənistanın saxta iddiaları ilə bağlı qalmaqallı sənədli film | BİZDƏN NƏ DANIŞIRLAR?

“Bizdən nə danışırlar?” verilişinin yeni buraxılışı yayımlanıb.

Verilişdə bildirilib ki, martın 30-da Almaniyanın ictimai yayım qurumu “Deutsche Welle”in efirində “Ermənistanın Qafqazda torpaq və kimlik uğrunda mübarizəsi” adlı veriliş yayımlanıb.

Sənədli filmdə İranın Ermənistandakı səfiri Mehdi Sobhani, Fransanın Ermənistandakı səfiri Olivye Dekotinyi, Avropa Parlamentinin üzvü Natali Luazo, ATƏT-in Minsk qrupunun keçmiş fransalı həmsədri Jak For, Regional Araşdırmalar Mərkəzinin direktoru Riçard Giraqosyan və digər şəxslər iştirak ediblər.

Filmin adından da göründüyü kimi, bu material birtərəfli, qərəzli və təhrif olunmuş təqdimatla hazırlanıb. Verilişdə Ermənistanın iddiaları “mübarizə” adı altında qəhrəmanlıq donuna bükülüb, amma onilliklər boyunca Azərbaycan xalqının yaşadığı ağrılar, etnik təmizləmə və işğal faktları tamamilə göz ardı edilib.

“Euronews” Azərbaycanda həyata keçirilən investisiya layihələri və ölkənin qeyri-neft sektorunun inkişafı barədə video yayımlayıb.

Videomaterialda İqtisadiyyat Nazirliyinin tabeliyində fəaliyyət göstərən “Azərbaycan İnvestisiya Şirkəti” ASC-nin tərəfdaşlarla birgə həyata keçirdiyi müxtəlif layihələrə diqqət çəkilib.

Qeyd olunub ki, “yaşıl enerji”, əczaçılıq, qida və digər sənaye sahələri üzrə yaradılmış müəssisələr istehsalı lokallaşdırmaqla yanaşı, ölkədə texnologiya transferini sürətləndirir.

Rusiyanın “Vestnik Kavkaza” nəşri “Azərbaycan Yaponiyaya investisiyalarını artırır” başlıqlı xəbər təqdim edib.

Xəbərdə qeyd olunur ki, 2024-cü ildə Azərbaycan Yaponiya iqtisadiyyatına investisiyalarını təxminən 10 dəfə artırıb.

Mənbə diqqətə çatdırır ki, Yaponiya 2024-cü ildə Azərbaycan iqtisadiyyatına 180 639 milyon dollar birbaşa investisiya yatırıb. Bu isə əvvəlki ilə nisbətən 13 213 milyon dollar və ya 6,8 faiz azalma təşkil edir.