Ermənistanın üçüncü tərəfləri bölgəyə cəlb etməsi sülhə mane olur

Xarici işlər naziri Ceyhun Bayramov iranlı həmkarı Hüseyn Əmir-Abdullahianla görüşüb. Bu barədə Azərbaycan Xarici İşlər Nazirliyindən bildirilib.

İran naziri ölkəmizdə keçirilmiş Prezident seçkilərinin uğurla nəticələnməsi və Prezident İlham Əliyevin yenidən bu ali vəzifəyə seçilməsi münasibətilə bir daha təbriklərini çatdırıb. Bu seçkilərin xüsusilə Azərbaycanın bütün ərazilərində keçirilməsi ilə əlamətdar olduğunu vurğulayıb.

Nazirlər həmçinin Azərbaycanın Səfirliyinə terror hücumunu törədən şəxsə qarşı məhkəmə hökmündən sonra, səfirliyimizin işinin bərpası istiqamətində addımlar barədə fikir mübadiləsi aparıblar.

Tərəflər bölgədə nəqliyyat və kommunikasiya dəhlizlərinin inkişafı və genişləndirilməsi istiqamətində planları da müzakirə ediblər.

Ceyhun Bayramov Ermənistanın sülh və sabitliyə xidmət etməyən üçüncü tərəfləri bölgəyə cəlb etməsi, Ermənistanın bəzi dövlətlər tərəfindən silahlandırılması səylərinin sülh prosesinə təhdid olduğunu bildirib.