Fransadan Azərbaycana qarşı qərəzli addım | Jurnalistin girişi qadağan edildi

Almaniyanın Bonn şəhərində keçirilən seminarda iştirak etmək üçün Azərbaycan Dövlət İnformasiya Agentliyinin ezam olunan əməkdaşının Şengen ərazisinə girişi iyunun 11-də Fransanın qeyri-qanuni sifarişi əsasında bloklanıb.

BMT-nin İqlim Dəyişmələri üzrə Çərçivə Konvensiyası Katibliyinin təşkilatçılığı ilə keçirilən tədbirə dünyanın bir çox ölkələrindən jurnalistlər dəvət edilib.

Bonn hava limanında “Azərtac”ın əməkdaşı Aygün Həsənovaya bildirilib ki, Fransa tərəfindən onun Şengen ərazisinə daxil olması yasaqlanıb. Çoxgirişli Şengen vizası, seminara dəvət və digər sənədlərin qaydasında olduğunu görən Almaniyanın rəsmi qurumları da bu məsələni araşdırmaq qərarına gəliblər.

Fransanın media işçisinə qarşı bu qərəzli hərəkəti səbəbindən “Azərtac”ın əməkdaşı bir neçə saat hava limanında saxlanılıb. Lakin Azərbaycanın Almaniyadakı səfirliyi və BMT-nin İqlim Dəyişmələri üzrə Çərçivə Konvensiyası Katibliyinin məsələyə qarışmasından, eyni zamanda Almaniyanın rəsmi qurumlarının Fransanın tələbinin əsassız olduğunu gördükdən sonra ona ölkəyə daxil olmasına icazə verilib.