Fransanın Azərbaycandakı yeni səfiri təyinatı ilə bağlı nələr dedi?

Azərbaycanın Fransadakı səfiri Leyla Abdullayeva Sofi Laquttu Fransanın Azərbaycandakı səfiri vəzifəsinə təyin olunması münasibətilə təbrik edib, Bakı ilə Paris arasında əlaqələrin inkişafına ümidvar olduğunu bildirib.

Bu barədə azərbaycanlı diplomat "X" hesabında yazıb.

"Hörmətli həmkarım Sofi Laquttu səmimi-qəlbdən təbrik edirəm. Ümid edirəm ki, birgə səylərimiz Azərbaycan və Fransa arasında ikitərəfli münasibətlərin inkişafına töhfə verəcək", – deyə Leyla Abdullayeva vurğulayıb.

Sofi Laqutt da təyinatına və iki ölkə arasında əlaqələrə dair "X" hesabında paylaşım edib.

"Ann Buayonun yolunu davam etdirərək tezliklə Azərbaycanda səfir kimi Fransaya, bizim maraqlarımıza və soydaşlarımıza xidmət etmək mənim üçün böyük şərəfdir. Ölkəmiz və Avropa İttifaqı üçün strateji regionda əlaqələrin inkişafını səbirsizliklə gözləyirik. Tezliklə görüşənədək", – deyə o paylaşımında bildirib.