Görüş zamanı sülh müqaviləsindən danışılacaq? | Qriqoryan

Ermənistan və Azərbaycan Baş nazir müavinlərinin növbəti görüşünün vaxtı hələ müəyyən edilməyib.

Bu barədə Ermənistan hökumət başçısının müavini Mqer Qriqoryan fevralın 22-də jurnalistlərlə söhbətində bildirib.

O, açıqlamasında delimitasiya prosesinə də toxunub:

“Çox vaxt bir çox insan sxematik və ya metodoloji xəritələri topoqrafik xəritələrlə səhv salır. İkincisi, əslində, delimitasiya prosesi sadəcə xəritələrlə işləmək deyil, bu, ilk növbədə, bu və ya digər xəritənin tərtib olunduğu hüquqi bazanın və bünövrənin müəyyən edilməsidir. Bütün bu nüanslar çox vacibdir və işimizdə nəzərə alınmalıdır.

Hüquqi əsasda ən yüksək səviyyədə, xüsusən Praqada və Soçidə Almatı Bəyannaməsinə açıq-aydın istinad edilən razılaşmalar var və bu o deməkdir ki, biz sərhəd xəttinin 1991-ci ilin dekabr vəziyyətinə uyğun olaraq təkrar müəyyənləşdirilməsi ilə məşğul olmalıyıq”.

Qeyd edək ki, fevralın 21-də Ermənistan Təhlükəsizlik Şurasının katibi Armen Qriqoryan Azərbaycan və Ermənistan xarici işlər nazirlərinin yaxın zamanda görüşəcəklərini deyib. O qeyd edib ki, sülh müqaviləsi layihəsi yaxın vaxtlarda iki ölkənin XİN başçılarının görüşündə müzakirə olunacaq.