Gürcü politoloqlar Ermənistanın təxribatlarından danışdı

Ağır atletika üzrə Avropa çempionatının Ermənistanın paytaxtı İrəvanda keçirilən açılış mərasimində Azərbaycan bayrağının yandırılması qonşu ölkələrin siyasi analitikləri tərəfindən də pislənilib.

Gürcü politoloqlar Baku TV-yə verdikləri müsahibələrində bayrağımıza qarşı edilmiş hərəkətin qəbuledilməz olduğunu vurğulayıblar.

Politoloq Nika Çitadzenin sözlərinə görə, idman tədbirində bayrağa qarşı bu cür hərəkət isə daha təəssüfləndiricidir. “Biz bilirik ki, qədim Yunanıstanda Olimpiada zamanı bütün müharibələr dayandırılır və diqqət mərkəzində yalnız yarışlar olurdu. 21-ci əsrin Ermənistanı isə bu qədim adəti pozmuş oldu. Ermənistan bu hadisəni törədənləri araşdırıb, mütləq şəkildə cəzlandırmalıdır”, – deyə o qeyd edib.

Gürcü politoloq Simon Kopadze isə Azərbaycan bayrağını yandıran erməninin bununla öz ölkəsini təhqir etdiyini deyib. “Azərbaycanlı idmançılar Ermənistanda qonaq idilər və keçirilən beynəlxalq idman yarışında iştirak üçün oraya getmişdilər. Qonaq ölkəyə qarşı atılmış bu addım qətiyyən yolverilməzdir”, – deyə o vurğulayıb.

Gürcü ekspertlər həmçinin İrəvanda baş vermiş bu hadisədən sonra Ermənistanın dünya ölkələri arasında nüfuzunun daha da düşdüyünü diqqətə çatdırıblar.