Gürcüstan Baş naziri azərbaycanlıları təbrik etdi | Marneulidə Novruz coşqusu

Gürcüstanda azərbaycanlıların kompakt yaşadıqları Marneuli rayonunda Novruz bayramı münasibətilə təntənəli bayram şənliyi keçirilib.

Tədbirdə Gürcüstanın Baş naziri İrakli Kobaxidze, Ombudsman Levan İoseliani, barışıq və vətəndaş bərabərliyi məsələləri üzrə dövlət naziri Tea Axvlediani, Azərbaycanın və Türkiyənin Gürcüstandakı səfirləri, eləcə də Gürcüstan parlamentinin deputatları, digər dövlət və hökumət rəsmiləri iştirak ediblər.

İrakli Kobaxidze bayram münasibətilə azərbaycanlılara sülh və əmin-amanlıq arzu edib. Gürcülərlə azərbaycanlılar arasında möhkəm dostluq əlaqələrinin olduğunu vurğulayıb:

"Bu gün biz qardaş və bacılarımızla birlikdə Novruz bayramını qeyd edirik. Bütün dostlarımızı bu münasibətlə təbrik edirəm. Bu bizim ümumi bayramımızdır. Hər birimiz bu sevinci bölüşürük. Novruz baharın gəlişi, yenilənmə bayramıdır. Bir daha Novruz bayramınız mübarək olsun!".

İrakli Kobaxidze müxtəlif stendlərə baş çəkərək azərbaycanlılara məxsus mədəniyyət, incəsənət, kulinariya nümunələri ilə tanış olub, idman yarışının qaliblərinə mükafatlar təqdim edib.

Daha sonra rəsmilərin iştirakı ilə bayram tonqalı alovlandırılıb. Rəsmi hissədən sonra bayram şənliyi konsert proqramı ilə davam etdirilib.

Tədbirə Azərbaycandan dəvət olunmuş incəsənət xadimləri də qatılıblar.