Heç kəs bizə kömək etmədi | Prezident antiterror tədbirlərindən danışdı

“Sonuncu görüşümüzdən sonra dünyada və regionumuzda bir çox hadisələr baş verib. Əsas geosiyasi dəyişiklik Azərbaycanın ərazi bütövlüyünün və suverenliyinin tam bərpasıdır”.

Bu fikri Prezident İlham Əliyev martın 14-də Bakıda işə başlayan “Parçalanmış dünyanın bərpası” mövzusunda XI Qlobal Bakı Forumunun açılış mərasimində çıxış edərkən deyib.

Dövlət başçısı əlavə edib ki, Azərbaycan işğalın qurbanı idi, etnik təmizləməyə məruz qalmışdı: “Bütün tarixi faktlar tam aydın idi və biz ədaləti, beynəlxalq hüququ özümüz bərpa etdik. Heç kəs bizə kömək etmədi. Biz bunu özümüz etdik və göstərdik ki, güclü siyasi iradəmiz, həmçinin potensialımız var. Çünki güclü hərbi imkanlar və xalqın birliyi olmadan biz uğur qazana bilməzdik”.

Prezident vurğulayıb ki, sonuncu antiterror əməliyyatından sonra hərbi sursatlar, ağır silahlar, zirehli maşınlar müsadirə olundu ki, onların dəyəri bir milyard dollara yaxın idi. İkinci Qarabağ müharibəsində götürülən hərbi qənimətlərin dəyəri isə 5 milyard ABŞ dollarına yaxın idi. Belə olan halda, sual yaranır ki, Ermənistan bütün bu pulları haradan əldə edib? Məlum idi ki, ermənilərin Azərbaycana qarşı istifadə etdiyi bütün silahlar onlara pulsuz verilmişdi.

Qeyd edək ki, Bakıda, Gülüstan sarayında Prezident İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə “Parçalanmış dünyanın bərpası” mövzusunda XI Qlobal Bakı Forumu keçirilir.