Hər kəs səfərbər olmalıdır | Fazil Mustafadan İrana çağırış

“Bizim kifayət qədər faktlarımız var ki, İran başqa ölkələrdə bir sıra terror aktlarına imza atmış ölkədir. İndi isə öz ölkəsində terror baş verib və bununla İran anlamalıdır ki, terror ən murdar yoldur”.

Bu sözləri yerli mediaya Milli Məclisin deputatı Fazil Mustafa İranın Kirman şəhərində çoxsaylı insan ölümü ilə nəticələnən terror aktı barədə danışarkən deyib.

Millət vəkili bildirib ki, bu murdar yolu seçdiyinə görə artıq bir neçə dəfədir ki, İranda da terror aktı baş verir:

“Buna baxmayaraq, yenə də harada keçirilməsindən asılı olmayaraq terror aktlarını pisləyirik, lənətləyirik. Çünki çox üzücüdür, nəticədə günahsız insanlar həyatlarını itirirlər”.

F.Mustafanın sözlərinə görə, bu terror aktı İrana bir mesajdır:

“Başqa ölkələrdə terroru dəstəkləyənlər hər zaman öz ölkələrində də belə bir hadisələrin baş verə biləcəyi ehtimalını diqqətdən qaçırmamalıdırlar. Ona görə də bütövlükdə dünyada terror hadisələrinin qarşısını almaq üçün ciddi addımların atılması vacibdir. Terror hadisəsi bir vəhşilikdir və hər yerdə böyük faciələrə səbəb olur. Düşünürəm ki, terrora qarşı mübarizədə hər kəs səfərbər olmalıdır”.

Qeyd edək ki, 3 yanvar 2024-cü ildə Kirman şəhərində general Qasım Süleymaninin 4-cü ildönümü mərasimi zamanı iki ardıcıl partlayış baş verib. Məlumata görə, 95 nəfər ölüb, 211 nəfər yaralanıb.

Fazil Mustafa isə ötən il İrana bağlı şəxslər tərəfindən teror hücumuna məruz qalıb.