Hərbi prokuror ermənilərin vəhşiliyini faktlarla xatırlatdı: Qarabağla bağlı mühüm açıqlama

"Azad edilmiş ərazilərdə 508 nəfərə aid meyit qalıqları tapılıb".

Bunu Baş prokurorun müavini, hərbi prokuror Xanlar Vəliyev “İtkin düşmüş şəxslərin taleyinin aydınlaşdırılması üçün milli və beynəlxalq səylərin artırılması” mövzusunda keçirilən beynəlxalq konfransda çıxışı zamanı deyib.

Onun sözlərinə görə, işğaldan azad olunmuş ərazilərdə bütün sahələri əhatə edən genişmiqyaslı tikinti-quruculuq işləri aparılarkən Ağdam, Şuşa, Göygöl, Tərtər, Füzuli, Zəngilan, Cəbrayıl, Kəlbəcər, Laçın və Xocavənd rayonları ərazisində aşkar edilmiş ən azı 98 şəxsə aid meyit qalıqları üzrə hərtərəfli araşdırmalar aparılır. Şuşanın Daşaltı kəndi ərazisində 28 şəxsə, Xocalının Fərrux kəndi ərazisində 12, Xocavəndin Edilli kəndində 27, Füzulinin Yuxarı Seyid Əhmədli kəndində 9, Şuşa şəhərindəki həbsxana ərazisində 31 şəxsə aid olmaqla ən azı 107 şəxsə aid meyit qalıqları aşkar olunub.

Hərbi prokurorun sözlərinə görə, ermənilər qətlə yetirdiyi ehtimal olunan və itkin düşmüş sayılan şəxsləri ümumbəşəri, dini və insanlıq qaydalarına uyğun olmadan, yəni qəbir qazılmadan quyu qazılmaqla kütləvi şəkildə basdırdığından meyit qalıqlarının müasir cihazlarla aşkarlanması effekt vermir.

"Füzulinin Aşağı Seyidəhmədli kəndində müasir cihazlarla axtarış müsbət nəticə verməyib. Adətən kütləvi məzarlıqlar əsirlikdən qayıtmış ayrı-ayrı şəxslərin ifadələri və əyani şəkildə göstərdikləri ərazilərdə tapılır”, – X.Vəliyev qeyd edib.