“Həyətimizin bir hissəsini Yesxabed adında Fransa ermənisinə verdilər” | QƏRBİ AZƏRBAYCAN XRONİKASI
“Qərbi Azərbaycan Xronikası” layihəsi çərçivəsində “Həyat Hekayəsi” verilişinin növbəti buraxılışı hazırlanıb.
“Türkiyədən, Suriyadan erməniləri məcburi aldadıb İrəvana gətirirdilər” adlı veriliş İrəvan və Vedi əsilli qərbi azərbaycanlı, tanınmış göz həkimi Paşa Qəlbinurun həyat hekayəsinə həsr olunub.
O, uşaqlıq illərinin ana yurdu İrəvan şəhərində, qismən isə ata yurdu Qərbi Azərbaycanın Vedi rayonunun Çimən kəndində keçdiyini deyib:
“Atam Çimən kəndindən, anam İrəvan şəhərindən olub. Ancaq biz ailə olaraq İrəvanda yaşamışıq. Yadımdadır ki, babamın İrəvandakı böyük mülkündə yuxarıda eyvandan “Neftçi” ilə “Ararat”ın oyununa baxırdım. İrəvan bizim şəhərimiz idi. Cəmiyyətdə üst mövqedə olan insanları müəyyən yollarla məcbur köçürürdülər”.
Onun sözlərinə görə, ailələri və qohumları 1954-1957-ci illərdə İrəvandan Şəmkirə köçüblər:
“Qərbdən, Avropadan, Türkiyədən, Suriyadan erməniləri məcburi aldadıb İrəvana gətirirdilər ki, oradakı azərbaycanlıları öz əzəli-əbədi Vətənlərindən uzaqlaşdırsınlar.
Mənim yadımdadır, qonşuluqda Yesxabed adında Fransa ermənisi var idi. Qonşunun və bizim böyük həyətimizin müəyyən hissəsini kəsib onlara vermişdilər. Onları yerləşdirmək üçün xüsusən azərbaycanlıların torpaq sahələrinin, mülklərinin müəyyən hissəsini Ermənistan hökuməti siyasi məkrlə alıb onlara verirdi”.
![icon](/images/loading.png)