Hikmət Hacıyev "Global Times" qəzetinə müsahibə zamanı nələrdən danışdı?

Prezidentin köməkçisi Hikmət Hacıyev Azərbaycanın həmişə vahid Çin siyasətini dəstəklədiyini açıqlayıb.

O, bunu Çinin "Global Times" qəzetinə müsahibəsində deyib. İki ölkə arasında güclü siyasi əlaqələrin mövcudluğundan danışan Hikmət Hacıyev Çinin Tayvan bölgəsində keçirilən qeyri-qanuni seçkini tamamilə qəbuledilməz qiymətləndirib.

“İndi biz iki ölkə arasında ticarət əlaqələrində sabit artım görürük, lakin bu, son nəticə deyil. Bunun üçün daha çox perspektivlər var. Birincisi, mən Azərbaycanda daha çox Çin şirkətləri görmək istərdim. Çin şirkətləri artıq Azərbaycan iqtisadiyyatının şaxələndirilməsində iştirak edirlər, lakin Azərbaycan yaşıl inkişafa doğru irəlilədikcə biz daha çox şey gözləyirik”, – o bildirib.

Hikmət Hacıyev diqqətə çatdırıb ki, dayanıqlı inkişaf məqsədlərinə əsaslanan milli prioritetlərdə rəqəmsal transformasiya Azərbaycan üçün bir nömrəli məsələdir:

“Yaşıl keçid gündəliyimizdə Çini tərəfdaş kimi görürük. Biz həmçinin çinli dostlarımızdan Azərbaycanda bərpa olunan enerji üçün istehsal xətləri yaratmağı istəyirik. Çindəki elektrikli avtomobil sənayesi dünyanın aparıcı sənayelərindən biridir. Hazırda Çindən elektriklə işləyən avtobuslar və digər avadanlıqlar alırıq. Biz Çin şirkətləri ilə əməkdaşlıq çərçivəsində Azərbaycanda istehsalat bazası yaratmaq istəyərdik”.

Prezidentin köməkçisi Çin-Azərbaycan tərəfdaşlığının “Bir Kəmər və Yol” Təşəbbüsü çərçivəsində, xüsusən də Orta Dəhliz kontekstində mühüm əhəmiyyət kəsb etdiyini bildirib.