Hikmət Hacıyev “Sülh Körpüsü” təşəbbüsünün iştirakçıları ilə görüşdü - Baku TV

Azərbaycan Prezidentinin köməkçisi – Prezident Administrasiyasının xarici siyasət məsələləri şöbəsinin müdiri Hikmət Hacıyev Qəbələdə Azərbaycan və Ermənistan vətəndaş cəmiyyətlərinin nümayəndələrinin iştirakı ilə baş tutan ikitərəfli görüşlə bağlı sosial şəbəkə hesabında paylaşım edib.

“Bu gün Qəbələdə “Sülh Körpüsü” təşəbbüsü çərçivəsində Ermənistandan olan vətəndaş cəmiyyəti nümayəndələri ilə açıq dialoq keçirdik. Müzakirələrimiz iki saatdan çox davam etdi. Bir daha vurğuladım ki, Azərbaycanın mövqeyi yalnız sülhə yönəlib”, – deyə Prezidentin köməkçisi bildirib.

Görüşdə həmçinin iki ölkə arasında ticarət münasibətlərinin yaranması və Azərbaycan ərazisindən Ermənistana məhsulların tranzit keçidinin təmin olunduğu qeyd edilib, TRIPP layihəsinin həyata keçirilməsi və bunun bölgədəki ab-havanın, bütün bir regionun nəqliyyat mənzərəsinin dəyişəcəyinə xidmət edəcəyi bildirilib.

H.Hacıyev qeyd edib ki, Azərbaycan və Ermənistan arasında sülh gündəliyi üzrə danışıqların ikitərəfli xarakter daşıdığı kimi, vətəndaş cəmiyyətləri arasındakı bu mübadilələrin və etimad quruculuğu tədbirlərinin də ikitərəfli xarakter daşıması vacibdir.

Prezidentin köməkçisi vurğulayıb ki, dünyada baş verən yeni təlatümlərin və müharibələrin fonunda Cənubi Qafqazda sülhün və təhlükəsizliyin təmin edilməsi olduqca vacibdir.