Hikmət Hacıyev diplomatik nümayəndəliklərə çağırış etdi - Baku TV

Şuşada Meksikanın Müstəqillik Günü münasibətilə təntənəli mərasim keçirilib.

Tədbirdə Azərbaycan və Meksika arasında siyasi, iqtisadi və humanitar əməkdaşlığın genişləndirilməsi imkanları müzakirə olunub.

Meksikanın Azərbaycandakı səfiri Mariya Viktoria Romero Kabalyero iki ölkə arasında siyasi dialoqun genişləndiyini, institusional əlaqələrin möhkəmləndiyini bildirib. O, xüsusilə ticarət və investisiya sahələrində əməkdaşlığın inkişafı üçün böyük potensialın olduğunu vurğulayıb.

Prezidentin köməkçisi Hikmət Hacıyev isə Azərbaycanın ərazi bütövlüyünün dəstəklənməsində Meksikanın nümayiş etdirdiyi prinsipial mövqeyi yüksək qiymətləndirib. Onun sözlərinə görə, qarşılıqlı hörmət və beynəlxalq hüququn norma və prinsiplərinə sadiqlik iki ölkə arasındakı münasibətlərin əsasını təşkil edir.

Hikmət Hacıyev Azərbaycan və Meksika arasında iqtisadi-ticari, enerji, mədəni-humanitar və digər sahələrdə əməkdaşlığın genişləndirilməsi üçün imkanların böyük olduğunu bildirib.

O həmçinin Meksikanın Müstəqillik Gününün artıq ikinci dəfə Şuşada keçirilməsini iki ölkə münasibətlərində yeni diplomatik ənənə kimi qiymətləndirib.

Prezidentin köməkçisi xarici ölkələrin diplomatik nümayəndəliklərini Şuşada və Azərbaycanın digər şəhərlərində bu kimi tədbirlərə qoşulmağa dəvət edib.