Hindistan Ermənistanı yenidən silahlandırır: Cənubi Qafqazda vəziyyət qarışır

“Hindistan son 1 ildə ilk silah partiyasını uğurla tədarük etdikdən sonra Qafqazdakı strateji müttəfiqi Ermənistana hərbi texnikanın növbəti hissəsini göndərməyi düşünür”.

Hindistanın “Economic Times” nəşrindəki materialda qeyd olunub ki, bu yaxınlarda Ermənistanın adı açıqlanmayan yüksək rütbəli rəsmisi Yeni Dehlidə olub və bununla bağlı müzakirələr aparılıb.

“Hindistan Ermənistanın tələblərinə uyğun olaraq etibarlı silah təchizatçısı kimi ortaya çıxıb”, – deyə məqalədə yazılıb.

Məlumata görə, yeni tədarükün təfərrüatları hələ ki məlum deyil. Qeyd olunur ki, silah partiyasına Azərbaycanla münaqişə olacağı təqdirdə işə yarayacaq avadanlıqlar daxil ola bilər.

Materialda Hindistanın Ermənistana göndərdiyi sonuncu partiyaya “Pinaka” reaktiv yaylım atəşi sistemləri, tank əleyhinə raketlər, döyüş sursatları daxil olduğu vurğulanıb. Silah tədarükünün Ermənistanla tarixi əlaqələri olan İran vasitəsilə həyata keçirildiyi bildirilir.

Nəşr xatırladıb ki, bu ilin əvvəlində Hindistan İran və Ermənistan birgə nəqliyyat dəhlizinin yaradılması üçün üçtərəfli əməkdaşlıq formalaşdırıb. “Azərbaycanın PUA-lardan istifadə etməsi Ermənistanın “Pinaka” sistemlərini satın almasının əsas səbəbidir”, – deyə materialda qeyd edilib.

Bildirilib ki, aşağı qiymət və istifadənin sadəliyi də bu sistemləri Ermənistan üçün ideal varianta çevirib.