İl ərzində 3-cü görüş və nəticələri | Ekspertlərdən açıqlama
Rusiya Prezidentinin Azərbaycana gerçəkləşdirdiyi dövlət səfəri 2024-cü ildə Prezident İlham Əliyevlə 3-cü görüşü idi.
İki lider bu il ərzində iki dəfə – bir dəfə Moskvada, bir dəfə isə Astanada beynəlxalq tədbir çərçivəsində görüşmüşdü.
Vladimir Putinin Azərbaycana olan dövlət səfərini 2022-ci ildə imzalanmış “Qarşılıqlı müttəfiqlik fəaliyyəti haqqında” Bəyannamənin müddəaları xüsusi əhəmiyyətli edir. Bəyannamədə regional təhlükəsizliklə bağlı yer alan məsələlər hər iki ölkə üçün bu görüşdə də aktual olub.
Politoloq İlqar Vəlizadənin sözlərinə görə, Azərbaycan və Rusiya münasibətləri bərabərhüquqlu ölkələrin münasibətləridir:
“Azərbaycan və Rusiya həm Qafqaz, həm də Xəzəryanı ölkələridir. Hər iki regionda təhlükəsizliyin olması və xaricdən olan müdaxilələrin minimuma endirilməsi həm Azərbaycanın, həm də Rusiyanın marağındadır. Çünki kənar təsirlər, müxtəlif coğrafiyalarda cərəyan edən mənfi proseslər onu göstərir ki, ölkələrin xalqlarına yaxşı bir şey vəd etmir”.
Rusiya Prezidentinin səfəri zamanı özü ilə geniş nümayəndə heyətini gətirməsi müxtəlif istiqamətlər, o cümlədən iqtisadi məsələlərin də diqqət mərkəzində olduğunu göstərib. Ümumi baxdıqda ötən il iki ölkə arasında ticarət dövriyyəsi 4 milyard dollardan çox olub.
Azərbaycan-Rusiya iqtisadi əlaqələrinin daha da şaxələndirilməsi üçün əlavə real imkanlar da açılır. Məsələn, Azərbaycanın sürətlə inkişaf edən 5 ölkədən ibarət qrupun – BRICS-in toplantısına dəvət olunması imkanların daha da geniş spektrdə dəyərləndirilməsinə imkan yaradacaq.
![icon](/images/loading.png)