İlham Əliyev Ağdamda bir sıra obyektlərin açılışında iştirak etdi

Prezident İlham Əliyev Ağdam Sənaye Parkında “Tabaterra” MMC-nin tütün məmulatları istehsalı müəssisəsinin açılışında iştirak edib.

Bu müəssisəyə 58 milyon manat investisiya qoyulub, 400 nəfər işlə təmin olunub. Şirkət yerli və beynəlxalq brendlər üzrə 120-dən artıq məhsul istehsal edir və məhsullarını bir neçə ölkəyə ixrac edir.

İqtisadiyyat naziri Mikayıl Cabbarov Prezidentə Ağdam Sənaye Parkı haqqında məlumat verib. 190 hektar ərazidə qurulan parkda indiyə qədər 121 milyon manatdan çox sərmayə yatırılıb, 650-dən çox daimi iş yeri yaradılıb. Parkın yaradılmasının əsas məqsədi Qarabağda sənaye və məşğulluğun inkişafıdır.

Prezident daha sonra Ağdam şəhər 1 nömrəli 960 şagird yerlik tam orta məktəbin açılışını edib. Bu müasir təhsil ocağı STEAM mərkəzi, laboratoriyalar, kitabxana, yeməkxana, idman və akt zalları ilə təchiz olunub və “Böyük Qayıdış” proqramı çərçivəsində inşa edilib.

Sonra Prezident 1 nömrəli 160 yerlik körpələr evi-uşaq bağçasının açılışında da iştirak edib. Bu məktəbəqədər təhsil müəssisəsində uşaqlar üçün tam şərait yaradılıb – yataq, oyun, musiqi və idman otaqları ilə təchiz olunub.

Dövlət başçısı daha sonra Ağdam rayonunun Qiyaslı kəndindəki tarixi məscidin binasının bərpadan sonra açılışında iştirak edib. Məscid işğal dövründə ciddi dağıntılara məruz qalıb, hətta mal-qara tövləsi kimi istifadə olunub. 2022-ci ildən Heydər Əliyev Fondu tərəfindən bərpa işlərinə başlanılıb. Bərpa zamanı məscidin ilkin görkəmi qorunaraq arxiv materiallarından istifadə edilib, günbəzlər və minarələr yenidən inşa olunub. İnteryerin və fasadın bərpası zamanı xüsusi texnologiyalar tətbiq edilib.