İlham Əliyev Azərbaycan xalqını təbrik edib - Baku TV

“Dünya Azərbaycanlılarının Həmrəyliyi Günü və Yeni il münasibətlə dünyada yaşayan bütün azərbaycanlıları ürəkdən təbrik edirəm. Onlara sülh, əmin-amanlıq və xoşbəxtlik arzulayıram”.

Bu fikirləri Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə xalqa müraciətində səsləndirib.

Dövlət başçısı qeyd edib ki, dünyanın müxtəlif ölkələrində yaşayan azərbaycanlılar bilməlidirlər və bilirlər ki, onların arxasında güclü Azərbaycan dövləti dayanır.

Prezident vurğulayıb ki, 2025-ci ildə baş verən hadisələr bu reallığı bir daha təsdiqləyib:

“Hansı ölkədə yaşamasından asılı olmayaraq, hər bir azərbaycanlının taleyi bizim üçün qiymətlidir və önəmlidir. Bizi ortaq tariximiz, dilimiz, köklərimiz və mədəniyyətimiz birləşdirir”.

Prezident əlavə edib ki, azərbaycanlılar dünyanın harasında yaşamalarından asılı olmayaraq, Ana Vətənlərinin müstəqil Azərbaycan dövləti olduğunu dərk etməlidirlər.