İlham Əliyev BNA ilə bağlı fərman imzaladı

Bakı şəhərinin inzibati ərazisində yol hərəkətinin təşkilində iştirak edilməsi, ümumi istifadədə olan nəqliyyat vasitələri ilə müntəzəm sərnişindaşıma və taksi minik avtomobilləri ilə sərnişindaşıma sahəsində tənzimləmənin və nəzarətin həyata keçirilməsi Rəqəmsal İnkişaf və Nəqliyyat Nazirliyinə həvalə edilib.

Bu, Prezident İlham Əliyevin imzaladığı “Bakı şəhərinin inzibati ərazisində avtomobil nəqliyyatı sahəsində idarəetmənin təkmilləşdirilməsi ilə bağlı əlavə tədbirlər haqqında” fərmanda əks olunub. Sənədə əsasən Rəqəmsal İnkişaf və Nəqliyyat Nazirliyinin tabeliyindəki Yerüstü Nəqliyyat Agentliyi “Bakı Nəqliyyat Agentliyi”nin ona qoşulması formasında yenidən təşkil ediləcək.

“Bakı Nəqliyyat Agentliyi” publik hüquqi şəxsin balansındakı əmlak Agentliyin balansına verilib. Nazirlər Kabineti bununla bağlı normativ hüquqi aktların təkmilləşdirilməsi ilə bağlı təkliflərini 3 ay, Agentliyin nizamnamə fondunun miqdarının artırılması barədə təkliflərini 4 ay müddətində hazırlayıb Prezidentə təqdim etməlidir.

Həmçinin “Bakı Nəqliyyat Agentliyi”nin balansındakı əmlakın Agentliyin balansına verilməsini 3 ay müddətində təmin etməli, Agentliyin maddi-texniki bazasının möhkəmləndirilməsi üçün zəruri tədbirlər görməlidir.