İlham Əliyev Ərdoğana başsağlığı məktubu ünvanlayıb

Prezident İlham Əliyev Türkiyədə baş vermiş və onminlərlə insanın həyatına son qoymuş dəhşətli zəlzələlərdən bir il ötməsi ilə bağlı türkiyəli həmkarı Rəcəb Tayyib Ərdoğana başsağlığı məktubu ünvanlayıb.

Dövlət başçısı faciə nəticəsində həlak olmuş şəxslərin əziz xatirəsini dərin hörmət və ehtiramla yad edib, onlara uca Allahdan rəhmət, doğmalarına və yaxınlarına səbir diləyib.

Məktubda bildirilib ki, 2023-cü ilin fevralında baş vermis fəlakət Türkiyəni olduğu kimi, Azərbaycanı da dərindən sarsıdıb. Xalqımız həmin ağır günlərdə qardaş Türkiyə xalqı ilə bir ürək olaraq faciənin ağrı-acısını bölüşüb, sonsuz kədərini birlikdə yaşayıb.

“Zəlzələ xəbərinin ilk dəqiqələrindən heç bir yardım çağırışını gözləmədən Azərbaycan xalqı və dövləti öz qardaşlıq borcunu yerinə yetirmək üçün bütün imkanlarını səfərbər etdi. Baş vermiş güclü zəlzələnin fəsadlarının aradan qaldırılması işlərinə və axtarış-xilasetmə əməliyyatlarına cəlb olunmuş xilasedicilərimiz, həkimlərimiz və könüllülərimiz türkiyəli həmkarları ilə çiyin-çiyinə böyük cəsarətlə, əzmlə və fədakarlıqla fəaliyyət göstərdi.

Dövlət və özəl qurumlarla yanaşı, kiçikdən böyüyə hər bir soydaşımız zəlzələ qurbanlarına dəstək və mənəvi dayaq olmaq üçün əlindən gələni əsirgəmədi”, – deyə başsağlığı məktubunda qeyd olunub.

Əlavə edilib ki, Azərbaycan hazırda Kahramanmaraş vilayətində humanitar fəaliyyətini davam etdirərək burada aparılan yenidənqurma və bərpa işlərində, sosial obyektlərin inşasında yaxından iştirak edir.

Sonda o da vurğulanıb ki, Türkiyə yaxşı gündə və hüznlü gündə Azərbaycanın yanında olduğu kimi, Azərbaycan da daim Türkiyənin yanındadır və bundan sonra da olacaq. Çünki biz bir millət, iki dövlətik.