İlham Əliyev Maykl Tuçin və Bernard Kaminetski ilə nələri müzakirə etdi?

Prezident İlham Əliyev dekabrın 11-də Amerika İsrail İctimai Əlaqələr Komitəsinin prezidenti Maykl Tuçini və Komitənin yeni seçilmiş prezidenti Bernard Kaminetskini qəbul edib.

Qəbula görə minnətdarlıqlarını bildirən Maykl Tuçin və Bernard Kaminetski dövlət başçısı ilə əvvəlki görüşlərini məmnunluqla xatırlayıblar.

Onlar Azərbaycanda mövcud olan dinlər və mədəniyyətlərarası dialoqun, ölkəmizdə müxtəlif dini konfessiyaların, etnik qrupların nümayəndələrinin qarşılıqlı hörmət və harmoniya şəraitində yaşamasının bütün dünya üçün nümunə olduğunu vurğulayaraq, dövlət səviyyəsində aparılan bu siyasətə görə İlham Əliyevə təşəkkür ediblər.

Qonaqlar ölkəyə səfər çərçivəsində Quba rayonunda və Qırmızı Qəsəbədə olduqlarını deyiblər və qeyd ediblər ki, bu qəsəbənin özünün mövcudluğu, onun çiçəklənməsi, orada yaradılmış unikal yəhudi muzeyi də dünya üçün bir nümunədir.

Maykl Tuçin və Bernard Kaminetski həmçinin Azərbaycanda yəhudi icmasının fəaliyyəti və dini ayinlərini həyata keçirməsi üçün yaradılan şəraitə, yəhudi ibadət ocaqlarına dövlət səviyyəsində göstərilən qayğıya görə minnətdarlıqlarını ifadə ediblər.

Dövlət başçısı da öz növbəsində qeyd edib ki, Azərbaycanda müxtəlif dini və etnik konfessiyaların nümayəndələrinin sülh və əmin-amanlıq şəraitində yaşaması xalqımızın həyat tərzidir və ölkəmizdə əsrlər boyu bu cür harmonik ab-hava mövcud olub.

İlham Əliyev vurğulayıb ki, bu eyni zamanda Azərbaycanda həyata keçirilən dövlət siyasətinin tərkib hissəsidir və bütün bunlar dövlət siyasəti çərçivəsində dəstəklənir.

Dövlət başçısı Azərbaycanın dinlər və mədəniyyətlərarası dialoq prosesinə beynəlxalq səviyyədə ciddi töhfə verdiyini və Bakının bu xüsusda aparılan müzakirələrin ev sahibi olduğunu qeyd edib.

Söhbət zamanı qarşılıqlı maraq doğuran məsələlər ətrafında fikir mübadiləsi aparılıb.