İlham Əliyev Nyu-Yorkda Portuqaliya Prezidenti ilə görüşüb

Sentyabrın 24-də Nyu-Yorkda Prezident İlham Əliyev Portuqaliya Respublikasının Prezidenti Marselo Rebelo de Souza ilə görüşüb.

Portuqaliya Prezidenti ilk növbədə dövlət başçısına Azərbaycanla Ermənistan arasında münasibətlərin normallaşdırılması və sülh gündəliyinin irəli aparılması ilə bağlı ABŞ Prezidenti Donald Trampın şahidliyi ilə əldə olunmuş nailiyyətlər münasibətilə təbriklərini çatdırıb. Prezident İlham Əliyev təbriklərə görə təşəkkürünü bildirib.

Vaşinqtonda keçirilən Zirvə toplantısının tarixi əhəmiyyət kəsb etdiyini deyən dövlət başçısı Azərbaycanın regionda sülh gündəliyinin təşəbbüskarı olduğunu vurğulayaraq, ölkəmizin bundan sonra da bölgədə sülhün gücləndirilməsi üçün səylərini davam etdirəcəyini bildirib.

Görüşdə Azərbaycanla Portuqaliya arasında müxtəlif sahələrdə əlaqələrin inkişafının, siyasi məsləhətləşmələrin davam etdirilməsinin və nümayəndə heyətlərinin qarşılıqlı səfərlərinin əhəmiyyəti qeyd olunub, beynəlxalq təşkilatlar çərçivəsində əməkdaşlıq məsələlərinə toxunulub.