İlham Əliyev Ramazan bayramı münasibətilə paylaşım etdi

Müqəddəs kitabımız “Qurani-Kərim”in nazil olduğu Ramazan ayı insanları gözəl niyyətlər və savab əməllər naminə birliyə çağırır, onları əmin-amanlıq və bərabərlik yoluna dəvət edir.

Bu fikirlər Prezident İlham Əliyevin Ramazan bayramı münasibətilə Azərbaycan xalqına təbrikində yer alıb.

Dövlət başçısı bildirib ki, bu ayda müsəlmanlar oruc tutmaqla Allah və din qarşısında vicdani borc və vəzifələrini ləyaqətlə yerinə yetirmək, mənəvi-əxlaqi kamilliyə ucalmaq fürsəti qazanırlar.

“Orucluq mərasimləri bütün İslam aləmində olduğu kimi, Azərbaycanda da hər il böyük fərəh və məmnunluq hissi ilə keçirilir. Ölkəmizdə milli-mənəvi həmrəyliyin, humanizmin, şəfqət və mərhəmət duyğularının təntənəsinə çevrilən Ramazan ayında dövlətimizin rifahı və tərəqqisi üçün dualar edilir, şəhidlərimizin ölməz xatirəsi minnətdarlıqla yad olunur.

İnanıram ki, insanların qəlbini və ruhunu ilahi hikmətlərlə nurlandıran mübarək Ramazan günlərində dua və diləkləriniz, saf niyyətləriniz Tanrı dərgahında qəbul olunacaq, uca Yaradan öz mərhəmətini xalqımızdan əsirgəməyəcəkdir”, – deyə dövlət başçısı bildirib.

Prezident İlham Əliyev dünyanın müxtəlif guşələrində yaşayan bütün soydaşlarımıza Ramazan təbriklərini çatdıraraq ailələrinə xoşbəxtlik, süfrələrinə ruzi-bərəkət arzulayıb.