İlham Əliyev TDT-nin Qəbələ sammitində hərbi əməkdaşlığın önəmini vurğuladı

Azərbaycan Prezidenti İlham Əliyev Türk Dövlətləri Təşkilatının (TDT) Qəbələdə keçirilən 12-ci Zirvə Görüşündə çıxış edərək, regional sülh və təhlükəsizlik mövzusu fonunda hərbi əməkdaşlığın vacibliyini xüsusi vurğulayıb. Dövlət başçısı beynəlxalq hüquq normalarının pozulduğu hazırkı geosiyasi çağırışlar dövründə Türk dövlətlərinin vahid güc mərkəzi kimi çıxış etməsinin zəruri olduğunu bildirib. Prezident, təhlükəsizlik təmin edilmədən inkişafın qeyri-mümkünlüyünü qeyd edərək, ölkələr arasında hərbi və hərbi-texniki sahədə əməkdaşlığın gücləndirilməsini önəmli amil adlandırıb. Bu çərçivədə, o, Türkiyə ilə dərin əməkdaşlığa toxunaraq, yalnız son bir ildə 25-dən çox birgə hərbi təlimin keçirildiyini qeyd edib. İlham Əliyev çıxışının sonunda 2026-cı ildə Azərbaycanda TDT-yə üzv ölkələrin birgə hərbi təlimlərinin keçirilməsini təklif edib.