İlham Əliyevdən Ukrayna ilə bağlı sərəncam

Prezident İlham Əliyev Ukraynaya humanitar yardım göstərilməsi məqsədilə Energetika Nazirliyinə vəsait ayrılması haqqında Sərəncam imzalayıb.

Sənəddə deyilir ki, Azərbaycan humanizm prinsiplərinə söykənərək, ikitərəfli və çoxtərəfli əsasda dünyanın bir çox ölkəsinə humanitar yardımlar göstərir. Ukraynada yaranmış son vəziyyətlə əlaqədar ölkəmiz Ukrayna xalqına da bir neçə dəfə humanitar yardım göndərib.

Azərbaycanla Ukrayna arasında münasibətlər dostluq və tərəfdaşlıq zəminində müvafiq ikitərəfli sənədlər, o cümlədən 2000-ci il 16 mart tarixli “dostluq, əməkdaşlıq və tərəfdaşlıq haqqında” Müqavilə, 2008-ci il 22 may tarixli “dostluq və strateji tərəfdaşlıq haqqında” Bəyannamə və 2022-ci il 14 yanvar tarixli “Azərbaycan Prezidentinin və Ukrayna Prezidentinin Birgə Bəyannaməsi” əsasında inkişaf edir.

Sərəncamda qeyd edilir ki, Ukraynaya humanitar yardım göstərilməsi məqsədilə elektrik avadanlığının satın alınması və göndərilməsi üçün Azərbaycanın 2023-cü il dövlət büdcəsində nəzərdə tutulmuş Prezidentin ehtiyat fondundan Energetika Nazirliyinə 7,6 milyon ABŞ dollarının manat ekvivalentində vəsait ayrılıb.

Maliyyə Nazirliyinə Sərəncamda göstərilən məbləğdə maliyyələşməni təmin etmək, Nazirlər Kabinetinə bu Sərəncamdan irəli gələn məsələləri həll etmək tapşırılıb.