İlham Əliyevin tələbələrlə bağlı imzaladığı sərəncam qüvvəyə mindi

2025-ci il sentyabrın 1-dən ali təhsil müəssisələrinin tələbələri üçün Prezident təqaüdünün məbləği artırılıb.

Belə ki, Prezident İlham Əliyev Azərbaycan Respublikası ali təhsil müəssisələrinin tələbələri üçün Prezident təqaüdünün məbləğinin artırılması və "Azərbaycan Respublikasının ali məktəb tələbələri üçün Prezident təqaüdünün təsis edilməsi haqqında" Azərbaycan Prezidentinin 2001-ci il 3 sentyabr tarixli Fərmanında dəyişiklik edilməsi barədə Fərman imzalayıb.

Fərmanla həmin məbləğ 350 manat müəyyən olunub. Bundan əvvəl Prezident təqaüdünün məbləği 275 manat təşkil edib.

Sentyabrın 1-dən həmçinin doktorantlara, ali təhsil, orta ixtisas və peşə təhsili müəssisələrində təhsil alan tələbələrə verilən təqaüdlərin də məbləği artırılıb. Prezident İlham Əliyev iyulun 24-də bununla bağlı müvafiq Sərəncam imzalayıb.